ХОСЫН ХАРИЛЦААГАА САЙЖРУУЛАХ 1 МИНУТ
Бид хосын харилцаагаа шинэхэнээр нь хадгалах, бэхжүүлэх, сайжруулахад ямар нэгэн үнэтэй бэлэг өгөх, онцгой үйл явдал тэмдэглэх, гэнэтийн том үйл явдлыг төлөвлөж биелүүлэх зэрэг “хэт давуулан” бодох нь элбэг байдаг. Эдгээр нь нөлөөтэй байдаг ч гэсэн харилцааг хамгийн ихээр тэтгэж байдаг зүйлс нь “би чиний талд, чи надад хамгийн чухал” гэсэн мэдрэмжийг өгөх давтагдмал үгс, жижиг үйлдлүүд юм.
Өдөрт 1 минутыг харилцаандаа зарцуулснаар таны хосын сэтгэлзүйн аюулгүй байдал сайжирч өдөр тутамд тохиох стрессийг даван туулах чадвартай болдог. Таны хийх ёстой алхам бол өдөрт 1 минутын завсарлага авч өөрсдийн харилцаандаа тохирсон үйлдлийг хийж дадал болгох юм.
Жишээ нь:
- Их ажлын дараах 1 минутын тэврэлт- дунджаар 20 секунд тэврэлдэх нь стресс үүсгэгч кортизол дааврыг бууруулж, хайрын даавар гэж нэрлэгддэг окситоцин дааврыг нэмэгдүүлдэг байна. 2022 онд гарсан судалгаагаар стресс ачаалалтай ажил гүйцэтгэхээсээ өмнө өөрийн хостойгоо тэврэлдсэн эмэгтэйчүүдийн кортизолын түвшин тэврэлдээгүй эмэгтэйчүүдийнхтэй харьцуулахад бага гарсан байдаг. Тэгэхээр тэврэлт нь стрессийг багасгаж болохуйц үр дүнтэй аргуудын нэг юм.
- Орой унтахын өмнөх талархал- Хосууд тухайн өдөр ямар нэгэн зүйлд талархаж буйгаа бие биетэйгээ хуваалцах бөгөөд юу ч байж болох юм. Хамгийн чухал нь үүнийгээ дадал болгох нь чухал.
- Өглөөний бяцхан ярилцлага- 1 минутын бяцхан ярилцлагыг “Өнөөдөр чи ямар ажил төлөвлөсөн бэ? Миний тусалж чадах зүйлс байгаа юу?” гэж эхлүүлснээр хосын хоорондын эерэг хамаарлын мэдрэмжийг төрүүлэх юм.
- Чимээгүй зан үйл- ярилцахаас илүү чимээгүй байдлыг илүүд үздэг хүмүүсийн хувьд энэхүү дадал нь тохиромжтой бөгөөд гар гарнаасаа атгаад суух, нэгнийхээ цээжинд толгойгоороо налах гэх мэт чимээгүй мөртлөө мэдрэмж төрүүлэх үйлдлүүд үүнд багтана.
Хос болгонд энэхүү дадал нь өөр өөр байж болох бөгөөд өөрсдийн онцлогтоо тохируулан шинэ дадлыг бий болгож ашиглах нь үр дүнтэй юм. 1 минутын хугацааны дадал нь шууд өөрчлөлтийг үзүүлэхгүй ч гэсэн урт хугацааны явцад том өөрчлөлт өгөх боломжтойг дараах байдлаар тайлбарласан байдаг.
- Америкийн сэтгэлзүйч Жон Готтманы олон арван жилийн хугацаанд хосууд дээр судалгаа хийсэн бөгөөд түүнийхээ үр дүнг тайлбарлахдаа “хүний сэтгэл хөдлөлийг “банк” гэж бодвол бидний өдөр тутмын хийж буй энэхүү 1 минутын жижиг үйлдэл нь бидний банкны дансандаа хийж буй орлого юм. Тэгэхээр бид үйлдлээ дадал болгосноор ирээдүйн амьдралдаа эерэг сэтгэл хөдлөл дүүрэн данстай болох боломжтой.
- Сэтгэлзүйч Барбара Фредриксоны судалгаагаар эерэг жижиг үйлдлүүд бидний тархинд нөлөөлж сэтгэл хөдлөлийн чадваруудыг сайжруулж урт хугацааны харилцааны нөөцийг бий болгодог байна.
Нийтлэлч: Publisher
