“ТАНИХГҮЙ ХҮН”-ИЙ ТУХАЙ ОЙЛГОЛТЫГ ХҮҮХЭДДЭЭ ХЭРХЭН ЗӨВ ӨГӨХ ВЭ? 

Үе үеийн эцэг эх, асран хамгаалагчид хүүхдүүддээ “танихгүй хүнтэй бүү яриарай” гэх  өгүүлбэрийг зааж, захисаар ирсэн. Гэвч зарим тохиолдолд танихгүй хүнтэй харилцах нь зөв байх боломжтой юм. Хэрэв хүүхдүүд олон нийтийн газар, гудамж гэх газруудад төөрч тусламж хэрэгтэй болвол хэнд хандах вэ? 

Болохгүй гэх хатуу дүрэм тогтоохоос илүү ямар үед танихгүй хүнтэй харилцах нь зөв буруу вэ гэдгийг ойлгуулах нь чухал юм. Эцэг эх, асран хамгаалагчтайгаа хамт явж байгаа тохиолдолд танихгүй хүнтэй мэндлэх, харилцах нь асуудалгүй юм. 

Харин таны хүүхэд дээр ганцаараа байхад нь үл таних хүн очвол бас анхаарах хэрэгтэй. Хэрэв таны хүүхэд дээр танихгүй хүн ойртож очих, ярилцах, амттан санал болгох, тэжээвэр амьтантайгаа тоглуулах гэх мэт саналуудыг асуувал шууд “үгүй” гэж чангаар хэлэх хэрэгтэйг хүүхэддээ зааж өгөөрэй. Ийм зүйл болсон тохиолдолд эцэг эх, асран хамгаалагч, багш гэх мэт өөрийн дотны хүмүүст энэ тухай заавал мэдэгдэх ёстойг хэлж өгөх хэрэгтэй юм. Мөн хүүхдийн биеийн нууц хэсэгт хүрэхийг оролдсон, хүүхдийг өөрийнх нь биед хүрэхийг шаардсан гэх мэт тохиолдлуудыг заавал хэлэх ёстойг ойлгуулах нь чухал юм. 

Хүүхдийн төсөөлөлд өөрт нь аюул учруулж болзошгүй хүн бол үлгэрт гардаг шиг муухай царайтай, муу хувцастай гэх мэтчилэн зүйлс байдаг. Гэвч бодит байдал дээр хүүхдэд аюулгүй мэдрэмж төрүүлэхүйц царай хувцастай танихгүй хүн, өөрийнх нь таньдаг хүн, хамаатан, бүр ойрын төрлийн хүн,  гэх мэтчилэн итгэж болохуйц хүмүүс аюул учруулсан байдаг тул үүнийг анхааруулах нь зүйтэй юм. 

Мөн хүүхдэд нь өөрт нь таагүй сэтгэгдэл төрүүлэх, ямар нэгэн зүйл буруу байгаа юм шиг санагдаж байвал тухайн газрыг орхиж итгэж болохуйц насанд хүрсэн хүнд хандах хэрэгтэйг хэлээрэй. Цагдаагийн албан хаагч, эмнэлэгийн эмч, дэлгүүрийн хамгаалагч, дэлгүүрийн ажилтан гэх мэтчилэн дүрэмт хувцастай хүнийг хайж олж очвол аюулгүй гэдгийг хэлээд хэрэв эдгээр хүмүүс ойр тойронд байхгүй бол эмээ өвөө шиг нь хүмүүс болон хүүхэдтэй хүмүүсээс тусламж гуйж болно гэдгийг тайлбарлаж хэлээрэй. 

Бид үргэлж хүүхдүүдээ танихгүй хүмүүсийн аюулаас хамгаалах боломжгүй ч гэсэн тэдний насанд тохирсон тайлбарыг, анхааруулгыг өгөх нь болзошгүй аюулаас сэргийлэх чухал алхам болно.