Гэр бүлийн хүчирхийллийг хэрхэн таних вэ
Гэр бүлийн хүчирхийллийн тухай эргэлзээтэй бодлууд, түүнийг таних нь:

  • Магадгүй, та хүчирхийлэл үйлдэгчийн үйлдлийг өөрийн чадлаараа эсэргүүцэж, өөдөөс нь үг сөргөж хэрэлдсэн байж болно. Энэ хэрүүл ямар нэгэн айдасгүй, хүч тэнцвэртэй маргааны шинжтэй, эцэст нь харилцан буулт хийж, уучлал гуйсан бол хүчирхийлэл биш юм.
  • Аливаад үзэл бодол нийлэхгүй байх нь айл гэрт байдаг л зөрчил. Зөрчлийг шийдэхгүй орхиж болохгүй.
  • Маргааны эцэст хэн нэг нь нэгнээ илт доромжлох, дээрэлхэх, цохиод авах, улмаар хүч хэрэглэж, давуу байдлаа тогтоосон, сэтгэлдээ гомдол цөхрөл тээж, айдас түгшүүртэй үлдсэн бол гэр бүлийн хүчирхийлэл мөн.
  • Хэрүүл бол хүчирхийллийн эхлэл гэдгийг ямагт санаарай.

Танд хэн ч, юу ч хэлж байсан, энэ таны буруу биш. Та хүчирхийллээс ангид байх эрхтэй.

 

Та дараах сорилыг бөглөж таны гэр бүлийн харилцаанд айдас түгшүүр байгаа эсэхийг тандаж мэдээрэй: https://familycenter.mn/familycenter/news/103

 

Илрэх шинж тэмдэг

Хэрэв танд дараах шинж тэмдэгүүд илэрч байгаа бол Та гэр бүлийн хүчирхийлэлд өртсөн байж магадгүй.

  • Таны хайртай хүн танд гар хүрсэн үү?
  • Таны амьдрал байнга айдас түгшүүртэй байх болсон уу?
  • Таныг үргэлж буруутган, доромжилж, заналхийлж байна уу?
  • Таны үйлдэл, хөдөлгөөн бүрийг хянаж байна уу?
  • Таны утас, фэйсбүүк, имэйл хаягийг тань байнга шалгадаг уу?
  • Таны найз нөхөд, ах дүү, хамаатан садан танайд ирэхээ больсон уу?

 

Сэтгэл санааны хувьд илрэх шинж:

  • Өөрийгөө буруутгах, доогуур үнэлэх
  • Байнгын айдас түгшүүртэй байх
  • Дасан зохицох чадваргүй байх
  • Хэн нэгэнд учир шалтгаангүй уураа гаргах
  • Архидах, мансуурах
  • Зүүдэндээ цочиж сэрэх
  • Сандарч тэвдэх
  • Тусгаарлагдсан, орхигдсон мэдрэмжтэй байх
  • Хий юм харах, сонсох
  • Ууртай догшин, сэтгэлийн хөдөлгөөнд автах, орилж хашгармаар санагдах
  • Анхаарал халамж шаардах
  • Цочрол гэмтлийн дараах стресс, эмгэг шинж илрэх
  • Ганцаардах, тусгаарлах
  • Ой тогтоолт муудах, анхаарал сарних
  • Уур бухимдлаа барьж чадахгүй байх
  • Байн байн санаа алдах, сэтгэлээр унах, уйлах
  • Бусдад итгэхгүй байх

Бие махбодын хувьд илрэх шинж:

  • Толгой өвдөх
  • Ходоод өвдөх, гэдэс базлах
  • Нойргүйдэх
  • Хэт их нойртой болох
  • Зүрх дэлсэх, гар салгалах
  • Хоолны дуршил ихсэх, буурах
  • Биеийн бүх хэсгээр өвдөх
  • Булчин чангарах